無綫一線花旦所剩無幾，咁啱胡定欣喺今年《萬千星輝頒獎典禮》中，有望「叫糊」嘅對手，又得佢自己明年滿約，最佳視后非佢莫屬啦，不過其他一線花旦就非常不滿喇。
汪阿姐坐足成晚，只得個「最佳節目主持獎」，當堂表情都冇埋，連平時好低調嘅老公羅家英，都即刻喺微博開火，鬧爆大台淨係掛住捧新人，仲要老婆以後唔好再參與比賽。
阿姐有老公代出頭，其他人就用行動表達不滿，好似早喺01年已經嫌出爐視后袒胸露肉搏出位嘅楊怡，賽後即刻向公司傳話，表明「唔想同佢喺工作上有來往」。
不嬲都唔多怨言嘅鍾嘉欣，對於自己坐正做女一咁多年，竟然俾胡定欣遲來先上岸，都忍唔住要私下同「處女黨」班姊妹吐苦水，但基於嘉欣自己唔係好得高層歡心，又試過推劇返加拿大放大假，搞到收警告信，所以嘉欣都唔敢向公司出聲。
即使係交足戲話撐胡定欣嘅田蕊妮，亦都冇俾面現身胡定欣嘅慶功宴。
不過俾人藐又如何，鬼叫無綫缺人，胡定欣就約滿，食正天時地利人和，二線變一線，上到位就得啦！【图片】